Фәнәвил Галиевне искә алу

 

Бу көннәрдә театр артисты, режиссёр, драматург, 1994 елдан Татарстан Республикасының театр  әһелләре  һәм 2000 елдан Язучылар берлеге әгъзасы, Татарстанның халык артисты Фәнәвил Галиевкә 60 яшь тулган булыр иде. Ләкин ул инде безнең арабызда юк, ә аның башкарган эшләре онытылмый, еллар узган саен хәтердә яңара гына бара.

Иске Йорт авылында туып-үскән якташыбыз, күренекле журналист Әгъзәм Фәйзрахманов Фәнәвил Галиевләрнең гаиләсен искә алып: “Абыем Әдһәм өйләнгәч, үзе укытучы булып эшли торган Арча районы  Югары  Әзәк авылында йорт алып җибәрде. Аның күршесе – инде шактый олыгая төшкән Әхми абый иде. Елның һәм тәүлекнең кайсы гына вакытында очратсам да, бу абый өе тирәсендә нәрсә дә булса эшләп йөрер иде. Гадәттә кечкенә малае Фәнәвил дә аның тирәсендә кайнаша, әтисенә булышып йөри.

Әхми абый күптән безнең арада юк инде, бакыйлыкка китеп барды. Кызганыч, Фәнәвил дә юк. Җигелеп эшләп йөргәндә, таланты чәчәк атканда үлеп китте. Моңа һаман да күңел ышанмый. Авылга кайткан саен ул килеп чыгар да, ике куллап күрешер, нәрсәләр белән шөгыльләнүем турында сораштыра башлар кебек тоела.

Бала чагында бик хәрәкәтчән, шук иде Фәнәвил. Урам малайларының командиры булырга яратты. Төрле уеннар оештырганда осталыгы белән аерылып торды. Җырларга, биергә яратты. Бераз үсә төшкәч, кичләре авыл клубында үтте. Үзе кебек үк малайлар, кызлар белән репетицияләр үткәрде, авылдашларына концертлар, спектакльләр әзерләде.

Югары Әзәккә кайткан саен, зиратка кереп чыкмый калмыйм. Фәнәвилнең кабере зиратның яңа өлешендә, һәркемгә күренә торган урында. Татар яшьләр театры коллективы элеккеге хезмәттәшләре каберенә чардуган тоткан, таш куйганнар.  Һаман да кайтып каберне чистартып, тәртипкә китереп йөриләр.

Фәнәвил Галиевнең балачагы, яшьлек еллары үткән авыл урамы бүген аның исемен йөртә. Кыска гына вакыт эчендә сәләтле драматург, актер, режиссер булып өлгергән якташларын әзәклеләр сагынып искә ала,”- дип яза 2019 елның 27 декабрендә “Мәдәни җомга” газетасында чыкакан мәкаләсендә.

Фәнәвил Әхми улы Галиев 1960 елның 4 гынварында районыбызның Югары Әзәк авылында туа. 1977 елда Габдулла Тукай исемендәге Яңа Кырлай урта мәктәбен тәмамлаганнан соң, 1978 – 1982 елларда Казан дәүләт мәдәният институтының театр режиссерлары бүлегендә һөнәри югары белем ала. 1982-1984 елларда армиядә хезмәт итә. Аннан кайткач  сигез ел Кәрим Тинчурин исемендәге Татар дәүләт драма һәм комедия театрында артист һәм режиссер булып эшли. 1992 елдан вафатына кадәр аның тормыш юлы  Габдулла Кариев исемендәге Казан Татар дәүләт яшь тамашачы театры белән бәйле, ул анда да артист һәм режиссер иде.

Фәнәвил Галиев төрле елларда Шаһиморат.Зәйнинең “Уеннан уймак” спектаклендә Моталлап, Фәнис Яруллинның “Бер күрешү үзе бер гомер”ендә Ризван, Дәрҗия Аппакованың  “Тапкыр егет”ендә Шәйхулла бай, Таҗи Гыйззәтнең “Кыю кызлар”ында Бәхтияр, Мирхәйдәр Фәйзинең “Галиябану”

ында Бәдри, Нәкый Исәнбәтнең “Җиде кыз”ында Курайчы , үзе язган сәхнә әсәрләре  “Хыялдагы дөнья”да Рәис, “Мәхәббәт өчпочмагы” нда Нәби һәм башка бик күп рольләрне тамашачылар сокланып карарлык дәрәҗәдә башкарды.

Якташыбыз 1993, 1996 елларда Мәскәү шәһәрендә артистлык осталыгын күтәрә, ә 2000 елда Олег Табаков театры студиясендә режиссура буенча белем ала. Ул  Шириаздан Сарымсаковның “Яшен чаткысы” һәм үзе язган  “Хыялдагы дөнья”, Мисс убырлы”, “Узма, яшьлек,заяга”, “Җырларым” һәм башка әсәрләрне зур осталык белән тормыш таләпләренә туры китереп сәхнәләштерә.

Драматург буларак Фәнәвил Галиев беренче адымнарын Кәрим Тинчурин исемендәге драма һәм комедия театрында куелган “Элмәктәге язмыш” пьесасы белән башлый. Әдипнең “Корт” пьесасы 2003 елда Татарстан Мәдәният министрлыгының Мәскәү тәнкыйтьчеләре белән берлектә үткәрелгән драматурглар семинарында “Иң яхшы пьеса” дип табылды.      Фәнәвил Галиевнең 2003 елда “Яңа татар пьесасы конкурсында “Тутык кыңгырау” әсәре җиңүче пьесалар рәтенә керде һәм “Яңа татар пьесасы” җыентыгында басылды. Ә 2004-2005 елда үткәрелгән “Яңа татар пьесасы” конкурсында аның Мәхмүт Галәүнең “Болганчык еллар”, “Мөһаҗирләр” романнары буенча эшләнгән инсценировкасы беренче урынны алды һәм бүгенге көндә дә Минзәлә театрында уңышлы бара.Фәнәвил Галиевнең пьесалары Әлмәт, Минзәлә, Чаллы, Казан яшь тамашачылар театр сәхнәләрендә, Туймазы, Чувашстан республикасы яшь тамашачылар һәм халык театрларында уңышлы барды һәм кайберләре бүген дә уйнала.

Югарыда әйтеп үтелгәннәргә өстәп якташыбызның оста гармунчы булуын, гитарада һәм курайда уйнавын, спектакльләргә җырлар язуын әйтеп үтәргә кирәк. Күп кырлы талант иясе Фәнәвил Галиев 2012 елның 5 январенда көтмәгәндә вафат булды һәм туган авылы зиратында җирләнде.

Фәнәвил Галиевнең ун ел бергә укыган сыйныфташы Камил Садыйков:”Аның белән без балачактан бергә уйнап үстек, бик оста оештыручы, төрле кызыклар, маҗаралар уйлап табарга ярата иде. Мәктәпләрдәге бер генә концерт та, спектакль дә аннан башка узмады. Авылны бик яратты, кайткач бергәләшеп балыкка йөри идек.Бергә укыган иптәшләрне очраштырып, гаилә хәлләрен белешеп яшәде. Без аны бик юксынабыз,”- дип искә ала. Ә Самания Камалова:” Ул кечкенәдән бик актив булды, ярдәмчел иде, укыганда ук театр артисты буласы билгеле иде һәм ул максатына иреште дә. Бергә эшләгән иптәшләре аны искә алып безнең авылга еш кайталар. Кыска гына гомерендә ул үзеннән бик күп истәлекләр калдырды”,- дип сыйныфташын бары тик уңай яктан гына искә төшерә.

Безнең музейның әдәбият һәм сәнгать бүлегендә аның тормыш юлы һәм иҗаты турында экспозиция куелган. Музей фондында аның төрле елларда төшкән фотолары, шәхси документлары, узе уйнаган һәм сәхнәләштергән спектакльләрнең афишалары саклана. 1982 елда Казан Дәүләт мәдәният институтының 4 курсында укыган вакытта Фәнәвил Галиев Иске Кырлай мәдәният йортында практика үтә. Диплом эше буларак Кәрим Тинчуринның “Хикмәтле доклад” комедиясен сәхнәләштерә һәм үзе үк анда төп рольне – Мортазаны уйный. Туган ягында башкарган бу беренче хезмәте өчен якташыбызга, укытучылары тарафыннан югары бәя бирелә һәм ул гомере буе үзе сайлаган һөнәренә тугры калып, театр сәнгатен үстерүгә үзеннән зур өлеш кертә. Без Татарстанның халык артисты Фәнәвил Галиевне искә алып, аның башкарган хезмәтләрен, туплап калдырган иҗатын яшь буынга җиткерү юнәлешендә даими эш алып барырга тиешбез.

“Казан арты” тарих-этнография музее

директоры урынбасары Шәфигулла Гарипов

Чудеса случаются…

Календарьларда ил тарихы

Музеебызның әдәбият һәм сәнгать бүлегендә төрле елларда чыгарылган кызыклы календарьлардан күргәзмә оештырылды. Календарьларның барлыкка килү тарихын, илебездә булган вакыйгаларны биредәге  экспонатлар аша күз алдына китерергә мөмкин. Ә инде 1945 елгы календарь бигрәк тә истәлекле, ләкин әле анда 75 ел элек 9 майда булган Җиңү көне билгеләнмәгән. Бу тарихи календарьда Совет армиясе тарафыннан азат ителгән шәһәрләр, халкыбызның батырлык үрнәкләре турында мәгълүматлар бирелгән. Күргәзмәгә рәхим итегез.

Шәфигулла Гарипов

Якташлар бүләге

Якташыбыз, күренекле язучы, шагыйрь, прозаик, публицист, әдәби тәнкыйтьче, җәлилче-галим, мөгаллим, филология фәннәре кандидаты, доцент, профессор, Татарстанның атказанган мәдәният хезмәткәре, Татарстан Республикасының Муса Җәлил исемендәге  премиясе лауреаты Хәнәфи Бәдигыйның бу көннәрдә генә “Муса Җәлил поэтикасы” дип исемләнгән китабы дөнья күрде. Бу китапка аның  Муса Җәлилгә багышлап язылган хезмәтләре  тупланган. Ул аны бик теләп безнең музеебызга тапшырды.

Шул ук очрашуда шагыйрә, бик күп җырлар авторы, педагог, Татарстанның атказанган сәнгать эшлеклесе, Язучылар берлегенең Һади Такташ исемендәге премиясе лауреаты Сания Әхмәтҗанова үзенең теләкләрен язып, “Язмышлар такыясы” исемле яңа гына чыккан китабын музеебызның әдәбият һәм сәнгать бүлегенә бүләк итте.

Яңа елга бүләк!

“Казан арты” тарих-этнография музееның Мөхәммәт Мәһдиев музей филиалы җитәкчесе  Габидуллина Халидә  “Безнең мирас” журналы оештырган “Хәтергә уелган китап” бәйгесендә  катнашып өченче урынны алды. Аның Мөхәммәт Мәһдиевнең “Торналар төшкән җирдә” китабына багышланган “Өстәлемдәге китап – тарих ядкаре” дип исемләнгән язмасы журналның 11 нче санында басылган иде. Хезмәттәшебезне зур җиңүе белән ихлас күңелдән котлыйбыз, яңа иҗат уңышлары телибез.

“Казан арты” тарих-этнография музееның

директор урынбасары Шәфигулла Гарипов

Төбәкара конференциядә

 

20 декабрьдә Яңа Кенәр урта гомуми белем мәктәбе ТАССРның 100 еллыгы, Бөек Җиңүнең 75 еллыгына багышланган РСФСРның атказанган укытучысы, Бөек Ватан сугышы ветераны Рәгыйб Усман улы Халитов исемендәге “Бәхет биргән туган җирем” төбәкара фәнни-гамәли конференциясе булды. Анда Пермь өлкәсенең Барда районы, Марий Эль республикасының Морки районы һәм Татарстан Республикасы районнарыннан укучылар һәм укытучылар катнашты. Конференциядә чыгыш ясаган укучыларның ныклы әзерлеге, башка елларга караганда фәнни эшләрнең эчтәлеге уңай якка үзгәрүе күзәтелә. Без мәктәпнең музее эшчәнлеге белән дә таныштык.

                                                                             Шәфигулла Гарипов

Язучының иҗаты белән таныштылар

Мөрәле башлангыч мәктәбе укучылары  М.Мәһдиевнең тормыш һәм иҗат юлы белән танышып, язучының музеена видеоэкскурсия ясадылар. М.Мәһдиевнең «Ай нигә йөри?» китабындагы көлдергечләрен тыңлап, туган сорауларга җаваплар эзләделәр, үз фикерләре белән бүлештеләр. Музей фондында булган кайбер экспонатлардан төзелгән күргәзмәне карап, күп мәгълүматка ия булдылар.
Халида Габидуллина

“Арча” җыры – Татарстан радиосында

    Арча якларына карыйм,

 Дустым Арча ягында.

Арча ягы бигрәк матур

 Кош  сайраган чагында.

      Бу  шигырь  юллары  бөтен  татар  халкы  яратып  тыңлый  торган  “Арча” җырыннан. Ә инде “Арча” җырына килсәк, Шамил абый кебек бу җырны әле беркемнең дә башкарганы юк. Арча шәһәрендә һәм авылларыбызда уздырыла торган чараларда, сабантуйларда, чит төбәкләрдә үткәрелә торган очрашулар вакытында “Арча” җыры башкарыла һәм аны һәркем үз итеп, яратып тыңлый. Ул чараларда Шамил Әхмәтҗанов үзе дә бик теләп катнаша, аның ягымлы, үзенчәлекле, көчле, аһәңле тавышы беркемне дә битараф калдырмый. “Арча” җыры дисәң Шамил абый, ә инде Татарстанның халык артисты Шамил Әхмәтҗановны әйтсәләр күңелләрдә “Арча” җыры яңгырый башлый.

Якташыбыз Шамил абый үзе: “Моннан 30 ел элек, 1989 елның ноябрь аенда “Арча” җырын Татарстан радиосына яздырткан идем һәм ул әле дә бик еш яңгырый. Шушы җыр аша мин туган ягыма сәлам җибәреп торам кебек һәм  татар халык җыры буларак анда районыбызның тырыш халкына булган хөрмәт һәм горурлык хисләре чагыла кебек”.

23 декабрь көнне Арча мәдәният йортында “Арча батырларын данлый” дип исемләнгән районыбыз алдынгылары бәйрәме булды. Анда якташларыбыз Татарстанның халык артистлары Шамил Әхмәтҗанов һәм Гөлзада Сафиуллина, фән докторлары Фәния Җамалиева һәм Гаптрәүф Нуриев, язучылар Хәнәфи Бәдигый, Риман Гыйлемханов, Рифат Җамал, Гүзәл Әдһәм, Вакыйф Нуриев, Сания Әхмәтҗанова, Рөстәм Галиуллин, журналистлар Әгъзәм Фәйзрахманов, Рамил Гарипов катнаштылар. Соңыннан түгәрәк өстәл янында сөйләшү вакытында да “Арча” җыры турында фикер алышу булды.

Бөтен гомерен Шамил Әхмәтҗанов белән аралашып яшәгән Гөлзада Сафиуллина: “Ул елларда Шамил абый башкаруында “Арча” җырын радиодан көнгә берничә тапкыр тапшыралар иде. Ул аны шул кадәр җиренә җиткереп, һәркемнең күңеленә үтәрлек итеп башкарды, бу җыр аның визит карточкасы булды. Шамил абый аны әле дә сәхнәдән егетләрчә башкарып тамашачыларның мәхәббәтен яулап тора. “Арча” җыры – ул мәңгелек җыр!”,- диде истәлекләрен яңартып.

“Без Шамил абый белән авылдашлар. Курса Почмакта гел  очрашабыз, ул авылдашларга “Арча” җырын еш бүләк итә. Бу көннәрдә минем “Язмышлар такыясы” дип исемләнгән китабым дөнья күрде. Бу китабымда “Арча поезды” шигырьләр циклында Арча районында туып-үскән олы шәхесләргә багышланган шигырьләр арасында авылдашым Шамил Әхмәтҗановка багышланган “Сорнай моңы илчесе” шигыре бар. Кереш сүз итеп, дөнья дәрәҗәсендә югары бәяләнерлек җырлар тудырган маэстро, авылдашым – Татарстанның халык артисты Шамил Әхмәтҗановка багышлыйм, дигән  юлларны яздым,”- диде горурланып Сания Әхмәтҗанова.

Аның Шамил Әхмәтҗановка багышланган бу шигырь юлларында җырчының биографиясе дә, җырлаган җырлары, бөтен  татар халкының аңа булган олы хөрмәте һәм ихтирамы чагыла. Хәзер без сезгә шул әсәрне тәкъдим итәбез:

 

Сорнай моңы илчесе

Бер чишмәнең суын эчеп үскән

Урамдашлар бит без, авылдашлар.

Бер туфракта яшьнәп, иртә язда

Күккә канат ачкан ябалдашлар.

Берләштерә безне уртак бер гамь:

Ата-баба йорты – туган авыл…

Талган канатларны имләр оя

Сиңа да ул хәзер, миңа да ул.

Хәтер күге тоныклана төшсә,

Зеңлап куя туганлыкның кылы:

Курса Почмак дигән төп нигезнең

Мин бер кызы булсам, син – бер улы.

Күрешеп, хәл-әхвәлләр сорашканда,

Сагыш тибә сагыну ярасында.

Тамчы-тамчы кояшкайлар шыта

Сөеп баккан көләч карашыңда.

Олпатларча тыйнак көлүеңнең

Гөлдерәве балачактан таныш.

Көтеп алган Коръән аятедәй,

Ишелеп туа җанга бәрхет тавыш.

***

Ана карынында сирпелгәндер

Тибрәнеше сиңа милли көйнең.

Канатларын сыйпап – чыныктырып,

Син аларны моң күгенә чөйдең.

Арча куенына тыйнак сеңгән

Тар “почмактан” чыгып, Акын кебек,

Бер очкыннан кабынып үрли-үрли,

Җанны ялмап алган ялкын кебек,

Илләр яулап, дөнья буйлап киттең…

“Идел кызы”, “Сәрвиназ”лар белән

Син Гыйракка кадәр барып җиттең.

“Уракчы кыз”, “Зиләйлүк”ләреңне

Мальта, Япониядә мәшһүр иттең.

Италия сине алкышлаган!

Киң мәйданда биш мең тамашачы

Ул көн үзен сиңа багышлаган.

Җырлагансың саф безнеңчә итеп…

Һәр җырыңны  алган алар көтеп,

“Нинди моң бу!” диеп таңга калган.

Хатын-кызлар гына түгел, хәтта ирләр

“Уел”ыңнан уелып сулкылдаган.

***

Фронтларга киткән әткәйләрнең

Көен отып алып яшәттең син!

Яудан кайтмый калган солдатларның

Өзелеп калган моңын, сыйпап –ялгап.

Гүя яңабаштан яшьнәттең син!

Халкыбызның сирәк җыр мирасын

Моң-сүрәңне өреп яшәрттең син!

“Мин калыктым “Сорнай моңы” белән,

Бу – үз җырым минем” дигән идең…

Халык моңы, милли аһәңнәрдән

Тетрәндердең күпме күңел күген.

“Арча” көе меңнәр хәтерендә

“Шамил җыры” булып яши бүген.

Идел төбәгенең моң илчесе,

Диеп йөртә халкым сине, зурлап.

Остазлыгың яши дәвамында –

Калмадың тик фидакярча җырлап,

Шәкертләрең, кызларыңа бүлдең

Җыр байлыгың, аталарча барлап.

***

Яшерен серен эзләп таңга калам

Син мәкамен тапкан дога –җырның.

Туган якның хәтер түрләрендә

Гел мөнбәрле булсын синең урының.

Кан кардәшләр, гәрчә, булмасак та,

Су кардәшләр бит без, моң кардәшләр.

Татар җыры аксакалы, диеп,

Килер буын башын иеп дәшәр.

Шамил кебек җырчы улы барда,

Татар яшәр әле! Мең-мең яшәр!

 

Әйе, якташыбыз Шамил Әхмәтҗановның “Арча” җырын радио аша тапшыра башлауга 30 ел вакыт узган. Ә ул җыр үзенең мәгънәсен, тәрбияви көчен бер дә югалтмый, еллар узган саен  татар халкының бик күп күренекле шәхесләр биргән Арча төбәге белән кызыксынуын арттыра гына бара.

“Казан арты” тарих-этнография  музее

 директоры урынбасары Шәфигулла Гарипов

Якташлары белән горурланалар

19 декабрь көнне Шурабаш төп гомумбелем мәктәбендә “Шушы яктан, шушы туфрактан без!” дип исемләнгән кичә булды. Анда Байкал авылында туып-үскән шагыйрь, прозаик, драматург, тәнкыйтьче, публицист, җәмәгать эшлеклесе Габделгазиз Монасыйповны, Яңа Сәрдә авылында туып-үскән театр артисты, драматург, режиссер Гафур Каюмовны искә алдылар,   аларның тормыш юллары һәм иҗатларына бәйле истәлекләрне яңарттылар.

Кичәгә районыбызның Шура авылында туып, бүгенге көндә Яр Чаллы шәһәрендә яшәп иҗат итүче шагыйрь, бик күп җырлар авторы Галиәхмәт Шаһи үзенең иҗатташ дусты, композитор, Татарстанның халык артисты Виталий Агапов белән кайткан иде. Укучылар Галиәхмәт Шаһиның шигырьләрен сәнгатьле итеп укыдылар, балалар өчен язган җырларын башкардылар. Кичә барышында Галиәхмәт абый үзенең бала чагы, мәктәп еллары, иҗатының башланып китүе турында сөйләде, төрле елларда язылган шигырьләре белән таныштырды. “Миңа тормыш сынаулары аша узарга туры килде. Күз алдына китерегез, иртән уянганда ике күзем дә күрми иде, ә миңа 42 яшь. Чаллы, Казан, Мәскәү больницаларында дәваландым, нәтиҗәдә бер күзем аз гына күрә башлады. Өйгә кайткач күңелемдә шигырьләр туды, ләкин яза алмыйм. Миңа диктофон алып бирделәр, улым укудан кайткач аларны тыңлап, кәгазьгә төшерә иде. Шулай итеп минем беренче шигырьләрем язылды һәм бүгенгге көндә егермегә якын китабым дөнья күрде. Бик күп композиторлар, шул исәптән бүгенге кичәдә катнашучы иҗатташым Виталий Агапов та кырыктан артык шигыремә көй язып, күбесен үзе башкара да. Берничә ел элек күземә операция ясаттым, хәзер уңайрак күрәм инде”,- дип сөйләде Галиәхмәт абый.

Виталий Агапов һәм аның улы, Галиәхмәт Шаһиның җырларын башкардылар, укучылар һәм укытучылар, килгән авылдашлары аларны бик яратып кабул иттеләр. “Галиәхмәт абыйны мин бик хөрмәт итәм. Ул тормышта тыйнак һәм сабыр булуы, тормыш авырлыклары килгәндә югалып калмыйча яшәп һәм иҗат итеп, онытылмаслык эшләре белән истә калырлык шәхес. Аның 200 дән артык шигыренә язылган җырларын Резеда Шәрәфиева, Равил Гәлиев, Гөлдания Хәйруллина, Әнвәр Нургалиев, Айгөл Сагынбаева, мин үзем һәм эстраданың башка күренекле артистлары башкара. Җырлары өчен ул бик күп дипломнар һәм грамоталар алды. Якташыгыз Илназ Бах көен язып үзе үк башкарган “Туганым” җыры өчен 2018 елда үткәрелгән “Татар җыры” фестивалендә алар “Алтын Барс” премиясе лауреатлары булдылар. Галиәхмәт Шаһиның шигырьләре үзләре үк җырлап торалар,”- диде горурланып  Виталий Агапов. Авылдашы Рәмзия Гайфуллина үзе баянда уйнап “Шура авылы” җырын башкарды. Бу җырның сүзләрен Галиәхмәт абый, ә көен Рәмзия үзе язган.

Якташыбыз Галиәхмәт Шаһи август аенда үзенең 70 яшьлек юбилеен билгеләп үткән иде. Мәктәп коллективы аны туган көне белән котладылар.  Арча районы башлыгы Илшат Нуриевның котлавын якташыбыз зур дулкынлану һәм горурлык хисләре белән кабул итте һәм олы рәхмәтен җиткерде.

Галиәхмәт Шаһиның  иҗатын һәркем ярата. Аларда аның узган тормыш юлы, әти-әнисенә  һәм туганнарына булган олы хөрмәт, туган авылы һәм аның кешеләре белән горурлану, билгеле инде беренче яшьлек мәхәббәте, олыгая барган саен фәлсәфи уйланулары чагыла. Аның  шигырьләрен укыгач, алар белән бергә яшисең, ә җырга әйләнгәннәрен тыңлаганда, күңелләр ял итә.

“Казан арты” тарих-этнография музееның әдәбият һәм сәнгать бүлеге  алып килгән күргәзмәдә Габделгазиз Монасыйпов, Гафур Каюмов, Галиәхмәт Шаһи турында күп мәгълүматлар алырга мөмкин иде. Шурабаш мәктәбе коллективы үзләренең якташлары белән горурланып яши. Укучылар яшьтән үк күренекле якташларының хезмәтләрен өйрәнеп, белеп үсәләр. Бу очрашу һәркем өчен файдалы булды.

                                                                                  “Казан арты” тарих-этнография музее

директоры урынбасары Шәфигулла Гарипов

Аудио


Башка язмалар
вход
Яндекс.Метрика