"Казан арты" музее

Язучылар берлегенең Тукай клубында Гомәр Бәшировның тууына 115 ел тулуга багышланган искә алу кичәсе булды. Әлеге күркәм кичәдә районыбыздан да вәкилләр катнашты. «Казан арты» тарих-этнография музее хезмәткәрләре язучының китапларыннан, шәхси әйберләреннән күргәзмә оештырды. Безнең фоторепортаж:

Арчада яшәп иҗат итүче шагыйрь, прозаик Зиннур Тимергалиев музейга үзенең яңа гына басылып чыккан беренче китабын бүләк итте.

Тукай клубында Мөхәммәт Мәһдиевның тууына 85 ел тулу уңаеннан искә алу кичәсе булды. Чарада арчалар да катнашты. Фәрит Хуҗин фоторепортажы.

«Казан арты» тарих-этнография музеенда Мөхәммәт Мәһдиевнең тууына 85 ел тулу уңаеннан искә алу кичәсе булды, әдипнең шәхси әйберләреннән, китапларыннан күргәзмә оештырылды. Әлеге чарага язучының кызы ТР Фәннәр академиясенең фәнни-оештыру бүлеге җитәкчесе, филология фәннәре кандидаты Гәүһәр Хәсәнова да кайткан иде. Соңрак очрашу кичәсе Арча педагогика көллиятендә дәвам итте.

Язучылар берлегенең Тукай клубында Гариф Ахунов тууына 90 ел тулуга багышланган искә алу кичәсе булды. Әлеге күркәм кичәдә районыбыздан да вәкилләр катнашты. «Казан арты» тарих-этнография музее хезмәткәрләре Гариф Ахуновның китапларыннан, шәхси әйберләреннән  күргәзмә оештырды.

Районыбызда әдәбият галиме, текстолог, педагог Хәй Хисмәтуллинны искә алу кичәсе булды. Әлеге кичәгә галимнең оныгы, физика-математика фәннәре кандидаты, РФА Казан фәнни үзәгенең Механика һәм машина төзелеше институты галимәсе Наилә Хисмәтуллина да кайтты. Мөхтәрәм кунак музеебыз фондына бабасы Габделхәйнең (Хәй) басылып чыккан, хәзер китапханәләрдә бик аз санда гына сакланып калган китапларын, фоторәсемнәрен тапшырды. Искә алу кичәсе галимнең туган авылы Кысна, Ашытбаш мәктәпләрендә дәвам итте.

“Казан арты” тарих-этнография музеенда Арча районы осталарының иҗат эшләреннән күргәзмә-сату оештырылды. Әлеге кичтә  һөнәрчеләр үзләренең хезмәт җимешләрен тәкъдим иттеләр. Фоторәсемнәрдә нинди дә булса әйбер ошаса һәм аны үзегездә булдырырга теләсәгез, музей хезмәткәрләре белән элемтәгә керә аласыз. 

«Казан арты” тарих-этнография музеенда Татарстан китап нәшриятында чыккан яңа китаплар белән укучыларны таныштыру, татар теле, әдәбияты укытучыларын дәреслек авторлары белән очраштыру, фикер алышу максатыннан “Китап бәйрәме” узды. Чарада нәшриятның уку-укыту методик эшләре идарәсе җитәкчесе Ч.И.Ялалова; татар теле һәм әдәбияты дәреслекләре авторлары, педагогика фәннәре кандидаты Р.Х.Ягъфәрова, педагогика фәннәре докторы Ч.М.Харисова, шагыйрә, прозак, нәшрият мөхәррире Ф.Җамалетдинова; “Сөембикә” журналының әдәби бүлек мөхәррире Э.М.Закирва катнашты.