"Казан арты" музее

Вафина Хәтимә Шәфигулла кызы хәзерге Арча районы Гөберчәк авылында 1932 елның 19 маенда гади колхозчы гаиләсендә дөньяга килә. Ул 7 класс белем ала. Яшь кыз җитез, уңган булып өлгерә. Ләкин яшьүсмер чоры Бөек Ватан сугышы чорына туры килә. Әнисенә ияреп уракка йөри, яшьтәшләре белән башак җыя, көлтә бәйли, ындыр табагында эшли. Язын шытып чыккан үлән, басуда калган черек бәрәңге җыю да эләгә. Ләкин күңел көрлеген югалтмый, киләчәкнең яхшы булачагына ышанып яши. Сугыш чорында чыныгып үскән кызны Пермь якларына урман кисәргә дә җибәрәләр. Ул анда да сынатмый, куелган норманы үти, тырышлыгы белән башкаларга үрнәк була. Шуннан кайткач, 1958 елда авыл егете Сәгыйдуллага кияүгә чыгып, өч балага гомер бүләк итә. Урманда кадр булып та эшләргә өлгерә, Югары фермада бозаулар карый. Йомшак күңелле, ярдәмчел, кешелекле Хәтимә Вафина кул эшләрен дә үз итә, пешерергә дә ярата, тәрәзә саен гөлләр үстерә. СМУдан килгән төзүчеләр янында да хезмәт куя. Балаларына тиешле белем, тәрбия биреп, хуҗалыгын да чиста-пөхтә тота. Күрше тирәсендәге балаларны да ярата. Ишегалдына кереп уйнарга яраткан нарасыйларның күңелләрен күчтәнәчләре белән күтәрә белә. Туганлык җепләрен дә югалтмый, һәрчак аралашып, ярдәмләшеп яши. Балаларын олы тормышка чыгарып, оныклар үстерешә. Ирен соңгы юлга озатып, үзе 2010 елда вафат була. Хәтимә апаның яхшылыкларын балалары гына түгел, ә авылдашлары, күрше-күлән дә сагынып искә ала.Ул Бөек Җиңүнең 65, 70 еллыклары уңаеннан медальләр белән дә бүләкләнә.

Халидә Габидуллина,

М.Мәһдиев музее җитәкчесе.