"Казан арты" музее

Акбитов Вали Гайнуллович

Арча районының данлыклы педагогика көллияте базасында оештырылган Россия регионнарында яшәүче татар балаларын берләштергән «ТатАрча җәй» исемле лагерьга йөрүче укучылар өчен эчтәлекле экскурсия оештырылды.

Быел Бөек Ватан сугышы беткәнгә 79 ел тулды. Илебез тарихында тирән эз калдырган, дәһшәтле Бөек Ватан сугышында миллионлаган кешенең гомере өзелде. Рәсми чыганакларга күз салсак, безнең районнан сугышка 27 меңнән артык кеше китә, шуларның 15 меңнән артыгы батырларча һәлак булган яки хәбәрсез югалган. Хәтер китабын ачып карасак, күпчелек исемнәр янында “Хәбәрсез югалган” диеп язылган. Фронтта һәлак булып, билгесез югалган дип исәпләнгән сугышчыларның якыннары аларның каберләренә барып рәхмәт һәм хөрмәт белдерә алмаулары да йөрәкне әрнетә.

Районыбызның хәрби комиссариаты “Хәрби дан клубы” ассоциациясе рәисе Михаил Валерьевич Черепанов белән берлектә бик зур һәм изге эш башкара: инде берничә ел дәвамында Бөек Ватан сугышында хәбәрсез югалган якташларыбызның һәлак булган урыннары табыла. Бу хезмәтләр барысы да “Арча хәбәрләре” газетасында даими яктыртылып килә.

Бүген “Казан арты” тарих-этнография музеенда ничә еллар исемнәре хәбәрсез югалганнар рәтендә булган якташларыбызның якыннары рәсми хәбәр кәгазен алдылар. Фронтта һәм тылда тыныч тормыш өчен көрәшеп, Җиңү сәгатен якынайткан, безнең арадан киткән каһарманнарның үлемсез батырлыгын искә алып кылган догалар һәлак булган якташларыбызның рухына барып ирешсен иде.

Бөгелмә районыннан килгән укытучылар һәм укучылар музеебызда эчтәлекле экскурсия тыңладылар. Арча районының бай тарихына, гүзәл табигатенә, данлыклы шәхесләренә соклану хисе белдерделәр.

Районыбыз тарихын яктырткан тагын бер затлы хезмәт барлыкка килде. «Каенсар тарихы» дип атала ул. Аны тарих фәннәре докторы, профессор Фәйзелхак Ислаев һәм аның хатыны Сания Ислаева иҗат итте. Музеебызда әлеге китапны тәкъдим итү кичәсендә катнашучыларга һәм хезмәтне бәяләүчеләргә рәхмәтебез чиксез!

Һәр елны табигатьнең иң матур вакытында 15 май көнне Халыкара гаилә көне билгеләп үтелә. Гаилә көне уңаеннан районыбызда төрле чаралар үткәрелә һәм аларның максаты гаиләдәге мәхәббәт, хөрмәт хисләрен яңарту, ә иң мөһиме бер-береңә карата игътибарлы һәм ихтирамлы булу.
15 май — гаилә көне уңаеннан музеебызда өлкәнннәр һәм яшьләр очрашты . Арча шәһәрендә бүгенге көндә бик күп үрнәк гаиләләр гомер итә. Бүгенге кичәбез кунаклары Баһаутдиновлар һәм Хамидуллиннар үзләренең бәхетле яшәү серләре белән уртаклаштылар, яшьләргә киңәшләрен бирделәр. Кунакларга “Күренекле гаиләләр – туган җирем байлыгы” исемле эчтәлекле күргәзмә дә тәкъдим ителде.
Гаиләм, диеп типсен һәрбер йөрәк,
Гаилә – ныклы ышаныч һәм терәк.
Чын бәхетнең тәмен татыр өчен,
Һәркемгә дә үз гаиләсе кирәк!
(Сания Әхмәтҗанова)